الوحدة الفلكية
#الفلك_للجميع
#الوحدة_الفلكية
يعني إيه وحدة فلكية AU ؟
هنبدأ بشرح بعض المفاهيم اللي بتستعمل باستمرار في الحديث عن الفلك..
في الفلك احنا بنتكلم عن مسافات شاسعه جداً .. يصعب فيها قياس المسافات بالوحدات العادية اللي بنستعملها على الأرض..عشان كده تم استحداث وحدات قياس جديدة أكثر مُناسبة للمسافات الشاسعة في الكون ..منها " الوحدة الفلكية "
الموضوع بشكل مُبسط كده شبه لما نقول فلان طوله كذا سنتيمتر..فتلاقي نفسك مش قادر تتخيله .. فنقولك طب هوا أطول من فلان ..أو أقصر من فلان..هنا إحنا إستعملنا قيمة ثابته إنتا متعود عليها وقسنالك الحاجة دي عليها عشان تقدر تستوعبها.
نفس الفكرة هنا .. بما إن المسافات بين الكواكب شاسعة جداً فهنستعمل قيمة ثابتة..هيا كبيرة بس ممكن تبقا مألوفة بالنسبالك.. هي المسافة بين الشمس و الأرض..وسميناها إسم بسيط جداً الوحدة الفلكية .
فبدل ما نقول بين كوكب كذا و كوكب كذا عدد مليار من الكيلومترات .. لا هنستعمل الوحدة الفلكية.
إذن فالوحدة الفلكية (Astronomical Unit) هي وحدة لقياس المسافات بين الأجرام السماوية القريبة نسبياً (زي كواكب المجموعة الشمسية ) و هي تساوي المسافة بين الأرض و الشمس = 149,597,871 كم.
يعني ببساطة إستعملنا حاجة قابلة للإستيعاب وهي المسافة بيننا وبين الشمس , ولكنها قيمة كبيرة نسبياً (مقارنة بوحداتنا الأرضية المعتادة) عشان نقدر نتعامل بيها في المسافات الشاسعة في الفضاء..
إذن هنستعمل المسافة بين الأرض و الشمس كمقياس ثابت نقيس عليه المسافات بين الكواكب في المجموعة الشمسية.
على سبيل المثال فان متوسط المسافة بين المشتري و الشمس تبلغ 5.2 وحدة فلكية. (يعني أكثر بقليل من 5 اضعاف المسافة بين الارض و الشمس.
نبتون و هو أبعد الكواكب تبلغ متوسط المسافة بينه و بين الشمس 30 وحدة فلكية .
والوحدة الفلكية تستخدم بشكل كبير و على نطاق واسع لقياس المسافات القريبة نسبيا في الفضاء ( مثلا المسافات بين كواكب مجموعتنا الشمسية و شمسنا ).
و تعتبر الوحدة الفلكية مناسبة لقياس المسافات القريبة داخل مجموعتنا الشمسية، أما للمسافات الكبيرة فتستخدم وحدة أكبر و هي " السنة الضوئية" (هنشرحها في منشورنا الجاي بإذن الله)
فبينما تبلغ المسافة الى نبتون و هو أبعد الكواكب عن الشمس 30 وحدة فلكية..فإن أقرب النجوم إلينا ( قنطور الأقرب : Proxima Centauri ) يبعد عنا مسافة تصل إلى 270,000 وحدة فلكية !
لذا فإن الوحدة الفلكية تصلح للاستخدامه في قياس المسافات بين كواكب المجموعة الشمسية .. بينما تستعمل السنوات الضوئية لقياس المسافة بين النجوم والمجرات.